كيف يفكر المصريون؟ حوار على المقهى

Tweet Follow @SARHAN_

طبق الاصل

انقل من حديث سمعته على القهوه قبل الصلاه بين مجموعه من الرجال مابين الخمسين والستين

 ..... الحديث له دلالات مهمه جدا

** بدأ الأول فقال: أول ما شفت الراجل سحب الكرسي للكتاتنى وقعده عليه عرفت انه كانك ياابوزيد ماغزيت .. سحبه له الكرسي يبقي ايه بقي

*** وقالهم هارفع الحصانه عن العضو اسمه ايه علشان النيابه قالو له لا ماترفعش عنه الحصانه ، يبقي انتو سبتوا ايه للى سبقوكم ، شويه ناس قعدت على الكراسي بدل غيرهم ، الكتاتنى قالهم  دا العضو هو اللى طالب رفع الحصانه فانكتموا

** قاعدين يتكلموا عن حق الشهيد والمصابين ، اروح يعنى اخزق عينى علشان اخد معاشي ، شهيد ايه وكلام فارغ ايه ، بلا قرف ، كان واقف على الحدود ياخى ، اومال فين شهداء الجيش والشرطه

** والست ام خالد سعيد ايهةالى جايبها التحرير ماتروح تتظاهر عند القائد ابراهيم ، بتقولك اصل التحرير هو الاصل وبتقولك انا ام الشهيد ، اصل ابنها كان واقف ماسك رشاش ومات فى الحرب

** امبارح اول مره اشوف الجدع دا الى اسمه ابوالفتوح ، بيهاجم الجيش وهو مترشح رئيس جمهوريه ، ازاى يعنى تبقي مترشح رئيس وتبقي بتهاجم الجيش اومال هتشتغل معاهم ازاى بلا نيله

** الاعلام بوظ البلد الله يخرب بيوتهم والصحافه القذره ، واقفين عند ماسبيرو بيقولك تطهير الاعلام وهما دول الى عاوزين يتطهروا ماتروحوا المحطات الخاصه .. الاعلام خرب البلد وكلهم مشيو وراه

** ايه البلد مافيهاش حاجه الا الكلام الى فى مجلس الشعب هيقعدوا يكلمونا عن الشهدا والمصابين والمحاكمه ، ماخلاص بقي ، مافيش شغل ومافيش اكل .. حد يقول ان كيلو السفندى يتباع فى الارض بخمسين قرش وماحدش بيشتري

** ولاسايح جه ولا مستثمر جه والعيش بالنشاره بدل الرده والانبوبه بتتباع بعشره جنيه امام المخزن .. ياباشا التريلات بتروح السوق السودا من برا لبرا

** عاوزين يسلموا السلطه من العسكري ، يسلموها لام عبده بتاعت الجبنه فى السوق ، سلطه ايه ونيله ايه، دا بقي ميدان التدمير

** قعدو يقولك كل واحد من بتوع الهيئات البرلمانيه يقول كلمه ، وقالك مصطفى بكري يقول كلمه عن المستقلين ، بيدوروا عليه لقوه غادر الجلسه ، بقلب المحطه لقيته مع معتز الدمرداش ، اه ماهو طبعا مضي فى الجلسه واتحسبت له وراح بقي ياخد الظرف من معتز

طبق الاصل

Follow @SARHAN_ Tweet